Kreu i Prokurorisë së Posaçme, SPAK, Altin Dumani në raportin e tij në KLP ka bërë një analizë të punës së këtij institucioni.
Dumani në raportin e tij tha se gjatë vitit që lamë pas është parë që rastet e pastrimit të parave, kanë qenë në rritje ku shtoi se gjatë hetimeve përveç përgjimeve telefonike po aplikohen të gjitha mjetet e posaçme të hetimit përfshi dhe agjentët e infiltruar.
Kreu i SPAK, ndër të tjera ka renditur të gjithë institucionet ku prokuroria ka akses të drejtpërdrejtë siç janë: Gjendja Civie, Kadastra, drejtoria e Burgjeve, regjistri i llogarive bankare, DPSHTR, regjistri noterial shqiptar, regjistri i pronave përfituese, sistemet e policisë së Shtetit, gjobat, raporte e statistike, Teams.
“Pasja akses e drejtpërdrejt e SPAK në këto databaza jep mundësinë për kryerje verifikimesh e hetimesh në mënyrë aktive dhe sa më shpejt duke evituar dhe rrjedhjen e informacionit”, theksoi ai.
Sa i takon çështjeve të korrupsionit të nivelit të zyrtarëve të lartë, Dumani tha se me kërkesë të SPAK, “GJKKO gjatë vitit 2022 ka dhënë 4 vendime dënimi me 4 të dënuar për ish zyrtarë të nivelit të lartë”.
“Në periudhën 2020-2022 në total janë hetuar gjithsej 24 procedime me 25 persona në hetim ndaj ish zyrtarë të nivelit të lartë. Ndër këto janë dërguar në gjykatë 8 të pandehur ish gjyqtarë.
3 procedime penale me 3 të pandehur prokurorë
1 procedim penal me 2 të pandehur ish deputetë
1 procedim penal me 1 të pandehur ish zv ministër
1 procedim penal me 2 të pandehur ish deputetë
1 procedim penal me 1 të pandehur anëtar i KPK
4 procedime me 4 të pandehur ish kryetarë bashkie”, tha Dumani.